Kungiyar kwallon kafa ta Chelsea da ke Ingila, ta cimma matsaya da RB Leipzig kan daukar dan wasanta Christopher Nkunku.
Tun a watan Satumbar wannan shekara ne likitocin Chelsea suka gwada lafiyar dan wasan.
- Tsohon Sakataren NEPU MK Ahmed ya rasu
- Ban ga laifin masu barin Najeriya don neman ingantacciyar rayuwa ba – Kakakin Buhari
RB Leipzig da Chelsea sun cimma yarjejeniyar ce kan Yuro miliyan 60, sai dai an karkare komai kan Yuro miliyan 70, sakamakon wasu tsarabe-tsarbe da Chelsea za ta biya.
Nkunku ya amince zai rattaba hannu kan yarjejeniyar zama a kungiyar na tsawon shekaru wanda zai ba shi damar murza leda yadda yake so.
Duk kungiyoyin sun amince da kulla yarjejeniyar, inda a yanzu kawai suke jiran lokaci da za a bude cinikayyar ’yan wasa don sanya hannu kan takardun da suka dace kafin sanar da komai a hukumance.
Ana sa ram dan wasan zai koma Chelsea a watan Yunin 2023, bayan an kammala kakar wasanni ta bana.
