Shugaban Kasa Muhammadu Buhari ya taya Tsohon Gwamnan Jihar Imo, Rochas Okorocha, murnar zagoyowar ranar haihuwarsa yayin da ya cika shekaru 58 a duniya.
Sakon taya murnar ya zo ne a cikin wata sanarwa da mai magana da yawun Shugaban Kasa, Garba Shehu ya wallafa a shafinsa na Facebook.
Shugaba Buhari ya kuma taya dukkanin makusanta da abokanan huldar Sanata Okorocha, mai wakiltar Imo ta Yamma a Majalisar Dattawa murna.
Buhari ya jinjina wa tsohon gwamnan dangane da kyakkyawar akidarsa ta rashin nuna kabilanci a tsakanin al’ummar Najeriya tare da yaba masa a kan Gidauniyar Rochas Okorocha da ya assasa domin tallafa wa mabukata da marasa galihu.
Sanata Rochas ya cika shekara 58 da haihuwa a ranar Talata, 22 ga watan Satumban 2020.
An haife shi a ranar 22 ga watan Satumba na shekarar 1962, shekara biyu bayan Najeriya ta samu ’yancin kai.
