’Yebe
Iya debe
Ki kwashe kayan bebe
Bar ni da watsattsaken zube
Batutuwa duk nai musu zobe
A mayar da wuka kobe
Fadan a bari sai gobe
Managartan ayyuka a zuzzube
Masu hankali a yi dube-dube
Kar a fara dambe
Kwamacala a kebe
Hatsaniya ta cabe
Minista da ma’aikata an babe
Baba sai ka yi dabe
Ko a daina daga lebe
Kwantiragin cuku-cuku
Kamun kazar kuku
Tunkuzar tunku
Tabargazar duku-duku
Kwarmaton iya taku
Lamarin ga akwai shakku
Haya-haya kamar a doku
Da muku-muku
Aka ce wani ya maku
Turak-turkar turakar turaku
Watsattsaken waskiya
Wasika ga Baban-burin-huriyya
Salwantar Hauro tiren-taliya
An kisma yawan kasan manuniya
Wai Mai shago ya juya
Azargagiyar zargi
Zarge-zarge da kugi
Tsallen takun agwagi
Mai kwakwazo na magagi
An kashe bakin mai gigi
Ka ce an yi kwantiragi
Tiren-taliya babu ragi
Rashin biyayya babu waigi
An sagaleka a sagagi
Sai kake ta bambamin rugugi
Ministan tunkuza
Ka yi taga-taga ka gaza
Sai ka mike ka tagaza
Mai shago ya dauki batunka banza
kazafinka ko’ina an baza
Bambaro
Bararo mai baro
Almarar Allanguburo
Fullo ya iya sharo
Bobo da kwambo sai mai biro
Cuku-cuku
Casu sai cunkuncu
Cuna ta kama wuta cuu
Camamar cin cuku
Caccakar caku
Babbaku da farfaru
Burgar bunsuru
Take-taken takun zuru
An fara dabarbaru
Tunkuzar tashin tantabaru
Fandararru
Fetsararru
kangararru
kadangaru
Masu fasa mana garu
kiren karairayi
karya mai kaikayi
kayar kayoyi
korafin kiyayyar sauyi
karajin kulafucin son matsayi
Haurobiyawa masu ka-ce-na-ce
Baba zai fayyace
Zancen zaure ne zaurance
Kwanakin ga nai kwatance
Kar a bar al’amura su kazance
Tsarin tsayuwa
Tsaba da tsakuwa
Tsibi-tsibin totuwa
Tsokacin tsoho da tsohuwa
Tsatsubar tsomomuwa
Mu ci tuwo da miyar yakuwa
Ina Haurobiyawa
Muna muku yekuwa
Mu kara karar amsa kuwwa
A hada kai a kiyayi kokowa
Lallai mu fatattaki ’yan wawa
Masu yi mana tsiwa
Sai na daka musu tsawa
Bisashe a ci harawa
Makekiyar makiyaya ce a dawa
Dabbobi na cin ciyawa
Garka da gayauna
Hatsi ya zo an amfana
Adawa in babu dawa
Wasu za su shiga dawa
Baba ya hana kwashi-kwaraf
Ballantana ai wa lalita karkaf
Wani na kukan an kife shi kif
Har ya dauke wuta dif
Ya shirya gidoga tsaf
Haurobiyawa Cuku-cukun Cunkuncu da Dabarbarun bambaron Baro da ke takun saka a Kamfanin tunkudo tunkuzar Haurobiya ya dauki hankalin jaridu da mujallun kasar, inda ake ta ka-ce-na-ce, har ma an karke da watsattsaken wasika da aka rika baza wa duniya. Baban-birin-huriyya dai ya fasko bsatun ingarman karfen karafa, watakila ma shi ya sa ya tsuke bakinsa, tunda an ce shi ya rattaba hannu kan amincewa da kwantiragin da ake kokarin kwantara wa Mai tantabaru kwagiri saboda shi.
Kullum dai a farfajiyar wannan makaranta mun sha fadi a bi doka don ka da a koka; a bi ka’ida sai a samu fa’ida, a bar mu mu sarara ko ma samu sa’ida. Don haka nike ganin da Ministan tunkuza bai shiga cuku-cukun Cunkunci ba, ai da bai yi karon-batta da Dabarbarun bambaron Baro, har suka cusa al’umma cikin rudani da tsoro.
Cuku-cukun Cunkuncu da Dabarbarun bambaron Baro ba mafita ba ce, musamman daidai wannan lokaci da ake fama da karyewar darajar albarkatun man tunkuza a kasuwannin duniya. Mu yi yunkurin karkata akalar albarkatun kasarmu kan labin kowace hanyar samu, domin kada mu damu, illa dai akai-akai mui rika samun damu, har ma mu karke da gasa damin tumu, amma a rage wa ’yan dugwi-dugwi tarin geron da za a sarrafa a rika a hada musu kamu. kin aiwatar da managartan dabaru da warware dabaibayin cuku-cukun cunkuncu na iya jefa kasar nan cikin turun kamammanmu.
Batu na ingarman karfen karafan kwangirin titin tarragon layin dogo, lokaci ya yi da Baban-burin-huriyya zai kafa doka cewa duk wanda ya yi wa gwamnati tonon silili kuma ta tabbata shi ne a kan doron bata, to za a tabbatar da cewa mukaminsa ya yi batan-baka-tantan.
Baba ka ja musu na zomo, ka zuba musu na-mujiya, ka kuma yi kokarin shawo kan duk wata hatsaniya, don gudun kada a karke da bahallatsa, har a shiga nunin yatsa, ko a kutsa uwar daka a kitsa miyagun al’amuran da zai hargitsa tattalin dukiyar kasa ya yi watsa-watsa. A mafi yawan lokuta ina gaya maka Baba ‘tsaya tsaf ka kimtsa.’ Kada ka yarda da ZUkI-TA-MALLE kama kare ka hada shi da zomo. Nauyi ne dai al’umma ta dora maka sai ka kara shirin nada gammo.
Lallai mu kasance masu kyakkyawar aniya, mu kiyayi waskiya da son rai a fafutikar neman mukami, har mu mutsuttsuke mukamuki ko laifinmu ya sanya a cafke mu a kundukuki.
