Wata Kotun Shari’ar Musulunci da ke zamanta a Unguwar Dambare a Jihar Kano ta yanke wa wani matashi hukuncin bulala ashirin sakamakon samunsa da laifin satar Zakara.
Bayan gurfanar da matashin, an karanto masa kunshin tuhumar da ake yi masa inda nan ta ke ya amsa laifin.
Ya kara da cewa kwadayinsa ne ya tashi domin tunda aka fara Azumin bana bai ci nama ba.
Jami’an ’yan sanda ne suka gurfanar da matashin mai suna Nazifi Hassan a gaban kotun karkashin jagorancin mai shari’a Mallam Munzali Idris Gwadabe.
An kama matashin ne a Unguwar Gwazaye da ke Karamar Hukumar Kumbotso ta Kano, yayin da ya saci Zakaran a kofar wani gida kuma tuni kotun ta bayar da umarnin a ba wa mai Zakaran kayansa.
