Shekarau ya sauya sheka zuwa NNPP —Abdulmini Jibrin

Tsohon Gwamnan Jihar Kano, Sanata Ibrahim Shekarau, ya sauya sheka zuwa jam’iyyar NNPP daga Jam’iyyar APC.

Tsohon Darakta-Janar na Kwamitin Yakin Neman Zaben Bola Tinubu, Honorabul AbdulMumin Jibrin, wanda a kwana-kwanan nan ya koma NNPP, shi ne ya sanar da sauya shekar ta Shekarau a safiyar Laraba.

• Sai na mulki Najeriya zan daina siyasa — Tinubu
• Kotu ta dakatar da shugabannin PDP na Jihar Kano

“Kurunkus! Maraba da zuwa NNPP, Sanata Ibrahim Shekarau,” kamar yadda Abdulmumini Jibrin ya sanar a shafinsa na Twitter.

Daga yaba Jam’iyyar NNPP, ta sanya hoton tsohon gwamnan Kanon tare da Shugaban Jam’iyyar na Kasa, Sanata Rabiu Kwankwaso, a ziyararsa ta baya-bayan nan zuwa gidan tsohon gwamnan mai wakiltar Kano ta Tsakiya a Majalisar Dattawa.

Kawo yanzu dai bai sanar da sauya shekar tasa ba, duk da cewa bangarensa da na Kwankwaso na ta tattaunawa a kan batun.

Gwamnan Jihar Kano, Abdullahi Umar Ganduje, a nasa bangaren, yana kokarin hana Sanatan mai ci sauya sheka, inda ko a baya-baya nan ya kai ziyara gidan tsohon gwamnan.