Hukumar Bayar da Agajin Gaggawa ta Kasa (NEMA), ta bayar da gudunmawar magunguna da kayayyaki ga wasu asibitoci uku a Jihar Kano, domin tallafa wa mutanen da bala’io’i daban-daban ya shafa.
Babban Daraktan NEMA, Mustapha Habib ne ya gabatar da kayayyakin, inda ya ce tallafin na daga cikin kokarin Gwamnatin Tarayya na tallafa wa mutanen da fashewar tukunyar gas da sauran bala’o’i suka aukawa.
- Miyagun Kwayoyi: NDLEA ta cafke mutum 130 a Kaduna
- Saudiyya ta daure mutum 11 shekara 65 saboda wadaka da dukiyar gwamnati
Daraktan wanda shugaban Hukumar na Kano da Jigawa, Dokta Nuraddeen Abdullahi ya wakilta, ya ce asibitocin da suka samu tallafin sun hada da Asibitin Kwararru na Murtala, da na Duba Gari da ke unguwannin Ja’en da Sharada.
Kayayyakin da aka raba sun hada da katan 10 na kayayyakin karin ruwa, da sinadarin wanke hannu na da kashe kwayoyin cuta, allurai da sauran magunguna da kayyakin jinyar marasa lafiya.
A nasa banagren Kwamishinan Lafiya na jihar, Dokta Aminu Tsanyawa ya ce tallafin zai taimaka wajen bunkasa harkar lafiya a jihar, kasancewar kari ne kan Naira miliyan 15 da gwamnati ta kashe wajen samar da makamantan kayayyakin.
