Kokon kwafar koto
Kulafacin karin kunto
Kwakwar karajin kato
Kulle-kullen kwarmato
Kwadagon tereren toto
Mutane masu himma
Na neman karin kima
Turka-turka ta jima
Ana ta fama
Wasu na ta fankama
A daukacin al’umma
’Yan tsiraru ke shan zuma
Gama-gari ga gumama
Ana ta hauma-hauma
Jikon jikaken tsumma
Kimar kudi
Ta haifar da radadi
Masana tattali ai budi
Malumma ai ta gargadi
Taska na da mabudi
A cikin lalama
Ake taho mu gama
’Yan kwadago ina makama
Yaji-gautan gardama
Mahukunta na ta lalama
Ijarar aiki ake takamma
Tsadar kaya ba alama
Gwamnati ai himma
Talakawa na hamma
A tsahirta da zalama
Masu gyara ai azama
Jami’an hukuma
Ga aiki a bazama
Masalaha babu tantama
A taho masana malumma
Na fasko wannan rigima
Mui azama
Kar ajima
Ana ta tuhuma
Manufa dai fita daga duma
Kurkura karmar kumbula
Kundunbalar kwalamar kwandala
Karajin karin kila-wa-kala
Kulunboton kwalla
Koton kakalen kwaila
Sandar samfewa da sulalla
Surkullen shakar kwala
Sukuwar aura da mangala
Sukur-sukur din talge na sulala
Sare-sarin shagalin shagalla
Gantalin gaula
Gararambar gafala
Gagarumar gudumar gula
Ganin galala
Gwangwaje galleliyar galila
Kwadon mandako
Gararamba da dan koko
Kwaki da karago aka jinko
Ja-in-jar sunkurun sako
Tariyar baya a fako
Magagin mai makoko
Rakin rarrashin roko
Mummunar fahimta da riko
Mirgina-mirginar lasar maiko
Jaga-jagar jinkar jiko
Dubun nunin saman babban lauje
Dumbujen kauje
Dungun dauje
Dundumin jaje
Dagar da’irar saje
Ladar kwadago
La’adar kadago
Laulawar hannun agogo
Lallami mai kwanan shago
Lallashi amarya da ango
Haurobiyawa ai awo
Juye-juyen kai-kawo
Kandamar damun dawo
Don jin dadin yawo
A samu miyar cin tuwo
Magabtanmu
Makiyan magabatanmu
Su ke tauye mu
Sun hana neman nakanmu
Har a rasa hatsin tumu
Baba a ba da hatsi
Kowa ya daina tsi-tsi
An tauna gurin guntsi
Kashi na da gautsi
Ko na kaza mai fatsi-fatsi
Kar a karke da yamutsi
Akwai tsokana da latsi
Ruwan rijiya na da zartsi
Hargowar haifar da hargitsi
Ai kokarin fita daga matsi
Sai a tallafi rayuwa
Mafi yawan talakawa
An bar su suna kwaruwa
Al’amura su zam gyaruwa
Ko a daina cutuwa
Masu mulki
Ai aikin kirki
Miyagu a taka musu burki
Mabukata a ba su a masaki
Ka da kowa yai raki
A biya Bokan Turai
Don ceton rai
Masu jinya ko jira-jirai
Uwar jiki tai kyau sarai
Wannan shi ne aikin kwarai
Ina Direban alli
Koyar da mu dabarar asali
Juhala a yanketa da kansakali
Darussa ai musu jaddawali
Koyi ka koyar a kowane hali
Lallai ai masalaha
Rayuwa ta dan yi arha
Da jin dadin shan gahawa
Babu bare balle bawa
Kowa-da-kowa ai ta raha
A daidai lokacin da zabi-sonka na shekara ta dubu karamin lauje da sili da manuniyar kasa ke karatowa, ana ta ZAKWADIN ZUMUDIN ZUNGURO ZUNGURUN ZAZZAGA DA ZUGA-ZUGIN ZUGAR ZAGAYE-ZAGAYE, inda ake ta faman tufka da warwara a kasar nan, musamman in an yi la’akari da turka-turkar takaddamar karin lada da la’adar kadagon kwadago da aka yi fama da ita cikin makonin da suka rare a guje. Kodayake kare-karen tsare-tsaren inganta rayuwar al’umma na da dadi, amma karin kudi na iya haifar da rudanin radadi, musamman idan darajar kudi ta fadi.
Haurobiyawa, sanin kowa ne a kasar nan tsallen badaken ’yan kwadago ba sabon al’amari ba ne. Don haka nake ganin lokaci ya yi da za a yi wa tufkar hanci, ko masu fafutikar laluben na-koko a ma’akatun gwamnati da kamfanonin kamfatar dukiya masu zaman kansu sa fice daga kunci.
Wajibi ne a kan kungiyoyin kwadago su san hakikanin abin da suke neman tabbatarsa, matukar dai ba rashin tabbas suke fafutika a kai, wadda ka iya haifar da: Gantalin gaula Gararambar gafala da Gagarumar gudumar gula da Ganin galala don Gwangwaje galleliyar galila.
’Yan makaranta masu koyon watsatsake da buda wagagen littattafai a farfajiyar Dodorido da ke cikin Amintacciyar jaridar kasar Haurobiya, mu yi wa kawunanmu masalaha, ta yadda tallafin tallafar harkokin rayuwa zai inganta walwala, ya kange mu daga wala-wala, don ta haka ne kawai hada-hadar harkoki za su yi arha, kowa-da-kowa ai ta raha.
Lallai a daina duk wani kulafucin kulle-kullen munafunci, domin su ke kara ingiza a’umma su afka cikin kunci.
Batu na ingarman karfen karafan titin tarragon layin dogo, ba tare da bata lokacin wulwulawar agogo ba, ’yan kwadago a himatu ka’in da na’in wajen ganin an inganta FARFAJIYAR KOYON WATSATTSAKE DA BUDA WAGAGEN LITTATTAFAI ta ’yan dugwi-dugwi, kuma a yi namijin kokarin kyautata farfajiyar Bokan Turai, don tarairaya da ceton rai; jami’an tsaro a tura su kwararo-kwararo, don shawo kan yanayin kasa na BA TSARO SAI TSORO, lallai a kara musu horo.
Tabbas aiwatar da managartan tsare-tsaren da na ambata a darasin makaranta, da ma wadanda ban ambata ba, za su yi matukar taimakawa wajen warware turka-turkar takaddamar turnukun tarnakin takun Kwadagon kwafar kadagon koto!
