Hukumar Hisbah ta sanar da cafke wasu mutum biyu da ake zargi da shirin daura auren jinsi daya a Jihar Kano.
Jaridar Kano Focus ta ruwaito Kwamandan Hisbah, Sheikh Aminu Ibrahim Daurawa na bayyana hakan yayin zantawa da manema labarai a karshen mako.
- Bidiyon Dala ba zai hana Ganduje muƙami ba – Muhammad Garba
- Gwamnatin Tarayya ta tabbatar da bullar cutar Anthrax a karon farko a Najeriya
Ya bayyana cewa, a cikin wani hoton bidiyo da hukumar ta yi arba da shi, an ga wasu maza biyu — Khalifa da Abubakar — suna sumbatar juna a wurin wani casu da ake zargi an shirya domin murnar baikonsu da aka yi.
Sai dai ya ce mutanen biyu da tuni sun shiga hannu, sun musanta zargin da cewa an shirya casun ne domin murnar zagayowar ranar haihuwar daya daga cikinsu.
A cewar daya daga cikin ababen zargin mai suna Khalifa, ya shirya wa kansa casun ne domin murnar zagayowar ranar haihuwarsa.
Ya ce a wurin bikin ne wani abokinsa mai suna Abubakar ya sanya masa kek a baki sannan ya biyo da sumbatarsa har baka.
Kwamandan na Hisbah dai ya ce ababen zargin biyu na hannu kuma bincike zai ci gaba da gudana.
