Mutane da yawa kan kasa tantancen wuraren da ya kamata su rika fesa turare don ya dade, wanda jim kadan bayan sun fesa turare sai a nemi kamshinsa a rasa. Hakan ne ya sa za a ga mutane na yawan fesa turare a-kai-a-kai.
A wannan makon na yi miki guzurin wuraren da za ki fesa turare don kamshinsa ya dade.
Akwai wadansu gabobi a jikin mutum da ake kira ‘pulse points’, wadannan gabobi suna da jijiyoyin jini, wanda a lokacin da jini yake zagayawa sukan dauki dumi su kuma fitar da kamshin turaren.
Wadannan gabobi sun hada da: zakaran wuya da wuyan hannu da bayan kunne da cikin gwiwar hannu da kuma kafa. Idan kika fesa turare a wadannan gabobi duminsu zai dumama shi, kamshinsa zai rika tashi.
A yayin fesa turare: Ki rika hankali da idanunki domin zai iya lahanta miki shi. Kada ki fesa a wurin da yake da rauni. Kada ki hadiye shi zai iya cutar da ke.
