Rundunar ’Yan Sandan Jihar Kano ta buga wasan sada zumunta tsakaninta da tubabbun ’yan daba a jihar.
A ranar Laraba ne bangarorin biyu suka barje gumi a wasan kwallon kafa da aka buga a filin wasa na Sani Abacha da ke Kofar Mata a Kano.
- Yanzu-yanzu: Tinubu ya aike wa majalisa karin sunayen ministoci
- Najeriya ta yanke wutar lantarkin da take ba wa Nijar
An buga wasan ne da misalin karfe 2 na rana, inda aka tashi kowa na da ci daya.
Rundunar ’yan sandan ta ce ta shirya wasan ne a matsayin wani mataki na samar da yanayi mai kyau tsakaninta da tubabbun ’yan daban.
A baya, rundunar ta fitar da jerin sunayen wasu ’yan daba da suka yi kaurin suna, inda ta bayyana tana neman su ruwa a jallo.
Hakan dai na zuwa ne bayan mutuwar wani jami’in dan sanda a unguwar Yakasai da ke jihar sakamakon fadan daba da ya kacame tsakanin wasu kungiyoyin daba biyu da ba sa ga maciji da juna.
