’Yan bindiga uku sun sheka lahira a wata arangama da suka kwashi kashinsu a hannun ’yan sanda a Jihar Neja.
Rundunar ’Yan Sandan Jihar ta ce an yi musayar wuta da masu garkuwa da mutanen ne a Karamar Hukumar Lapai inda aka yi garkuwa da mutane uku a wurare daban-daban.
- Fallasa: Bidiyon yakin Syria ne Boko Haram ta yi wa kanikanci
- An fara yi wa maniyyata aikin Hajji rigakafin COVID-19
- Ana bikin fito da gawar Fir’uana a Masar
- ‘Ni na koya wa Ali Nuhu da Adam Zango rawa’
Kakakin Rundunar, DSP Wasiu Abiodun ya ce bayan samun labarin ne jami’an ’yan sanda da hadin gwiwar ’yan banga a Lapai suka bi sawun bata-garin zuwa cikin daji, kusa da kauyen Fapo inda aka yi dauki-ba-dadi.
“A nan aka bindige uku daga cikinsu, aka kwato bindiga kirar AK47 guda uku, sauran masu garkuwar suka tsere, aka kuma ceto mutum ukun da aka sace,” inji shi.
Ya ambato Kwamishinin ’Yan Sandan Jihar, Adamu Usman, na kira ga jama’ar Jihar su kwantar da hankalinsu, su ci gaba da harkokinsu yadda suka saba.
Sannan ya roke su da su taimaka wa Rundunar da rahoton duk wanda aka gani da raunin harbi.
