’Yan bindiga sun kashe wasu mutum tara da suka hada da ’yan banga hudu a unguwar Sabon Layi da ke Karamar Hukumar Birnin Gwari a Jihar Kaduna.
’Yan bindigar sun yi ta harbe-harbe tare da kashe mutum tara kafin su yi awon gaba da wasu sama da 20 tare da wasu dabbobi.
- NAJERIYA A YAU: Yadda Sabon Tsarin CBN Zai Raba Mutane Da Ayyukansu
- Bene mai hawa 7 da ake aikin gina shi ya rushe a Legas
Idan dai za a iya tunawa, dakarun Operation Forest Sanity ta sojojin Najeriya sun yi wa wani kasurgumin shugaban ’yan bindiga a jihar, Isiya Danwasa da yaransa kwanton bauna tare da kashe shi.
Bayanai sun nuna cewa Isiya Danwasa ya yi kokarin tura daya daga cikin ’ya’yansa ya sayo wasu makamai da alburusai a garin Kaduna.
Kakakin rundunar sojin, Laftanar-Kanar Musa Yahaya, ya bayyana a wata sanarwa a ranar Laraba cewa, daga bisani, sojojin sun bi sawun yaron sun kama shi, inda suka yi amfani da shi wajen kama wasu shugabannin ’yan bindiga guda biyu.
A baya-bayan nan dai jami’an tsaro na ci gaba da samun gagarumar nasara a yaki da ’yan ta’adda a Arewacin Najeriya.
