Shugaban Kasa Bola Ahmed Tinubu ya yi ganawarsa ta farko da shugabannin tsaro da na leken asiri a Fadar Shugaban Kasa da ke Abuja.
Babban Hafsan Tsaro, Janar Lucky Irabor ne ya jagoranci mahalarta taron da suka hada da Babban Hafsan Sojin Kasa, Laftanar-Janar Farouk Yahaya da Babban Hafsan Sojin Ruwa, Vice Admiral Awwal Gambo da Babban Hafsan Sojin Sama, Air Marshal Isiaka Amao dai kuma Sufeto-Janar na ’yan Sanda, Usman Alkali Baba.
- CBN ya kara farashin Dala zuwa N630
- Yadda hukumomin gwamnati suka salwantar da tiriliyan 3.8 a mulkin Buhari —Rahoto
Sauran su ne Darakta-Janar na Hukumar Tsaro ta Farin Kaya (DSS), Yusuf Bichi da Darakta-Janar na Hukumar Leken Asiri ta Kasa (NIA), Ahmed Rufa’i Abubakar.
A ranar Laraba ne shugaban ya gana da Shugaban Hukumar Yaki da Masu Yi Wa Tattalin Arzikin Kasa Zagon Kasa (EFCC), Abdulrasheed Bawa, a fadar shugaban kasa.
