✕ CLOSE Noma Da Kiwo Hotuna Kiwon Lafiya Girke-Girke Sana'o'i Kimiyya da Kere-Kere Ra'ayin Aminiya Ra’ayoyi Rahoto
Click Here To Listen To Trust Radio Live

Liverpool ta yi kaca-kaca da United a Anfield

Liverpool ta taba cin Manchester United 7-1 a 1895.

Liverpool ta sharara kwallo 7-0 a ragar Manchester United a Gasar Firimiyar Ingila ranar Lahadi a Anfield.

Liverpool ta ci kwallo biyu ta hannun Cody Gakpo, Darwin Nunez shi ma biyu ya zura a raga, Mohamed Salah ya ci biyu, sannan Roberto Firmino ya zura na bakwai.

Karon farko da Liverpool ta ci United kwallo da yawa a tarihin haduwar da suke yi, wasan farko da aka dura kwallo da yawa a ragar kungiyar Old Trafford tun bayan shekara 92.

Liverpool ta taba cin Manchester United 7-1 a Oktoban 1895 a gasar rukuni na biyu.

An kawo karshen wasa 12 da United ta buga a dukkan fafatawa ba tare da an doke ta ba, tun bayan 3-2 da Arsenal ta yi mata a Janairun 2023.

Kawo yanzu Mohamed Salah ya zama kan gaba a Liverpool a yawan cin kwallaye a Firimiyar Ingila a tarihi mai 129 a wasa 205.

Da wannan sakamakon Liverpool ta yi sama zuwa mataki na biyar da maki 42 a teburin babbar gasar tamaula ta Ingila.

Ita kuwa United wadda ta dauki Carabao Cup a bana tana ta ukun teburin da maki 49.

Liverpool za ta ziyarci Bournemouth ranar 11 ga watan Maris a Gasar Firimiyar Ingila, sannan kwana hudu tsakani ta fafata da Real a Santiago Bernabeu.

Real Madrid ta ci Liverpool 5-2 a wasan farko a zagayen ’yan 16 a Gasar Zakarun Turai ranar 21 ga watan Fabrairu.

Ranar 9 ga watan Maris, United za ta karbi bakuncin Real Betis a wasan farko a zagayen ’yan 16 a Europa League da za su fafata a Old Trafford.