✕ CLOSE Noma Da Kiwo Hotuna Kiwon Lafiya Girke-Girke Sana'o'i Kimiyya da Kere-Kere Ra'ayin Aminiya Ra’ayoyi Rahoto
Click Here To Listen To Trust Radio Live

Bayan shekara 10, an dage haramcin amfani da babura a Yobe

Wannan matakin na zuwa ne a sakamakon ci gaban da aka samu a fannin tsaro.

Bayan shekara goma Gwamnatin Jihar Yobe ta dage haramcin amfani da babura masu kafa biyu a duk ilahirin Kananan Hukumomi 10 da ke Kudu da Arewacin Jihar.

Gwamnan Jihar Mai Mala Buni ne ya sanar da hakan a Fadar Sarkin Nguru, inda ya ziyarta domin jajanta wa al’ummar yankin dangane da ibtila’in gobara da ya auku a Babban Kasuwar Nguru.

Gwamnan ya sanar cewa a yanzu mazauna jihar suna da ’yancin amfani da babura domin saukaka musu sufurin zuwa gonaki da sauran wuraren da suka bukata.

Ya jaddada cewa wannan sabon matakin na zuwa ne a sakamakon yanayi na ci gaban da aka samu a fannin tsaro a yankunan.

Ana iya tuna cewa, tun a shekarar 2012 da ta gabata ce Gwamnatin Jihar Yobe ta haramta amfani da babura masu kafa biyu a yayin da rikicin Boko Haram ya tsananta.

Daga cikin Kananan Hukumomin da aka sahalewa amfani da baburan a yanzu sun hada da Bade, Nguru, Karasuwa, Yusufari, Machina, Jakusko, Fune, Fika, Nangere da kuma Potiskum.