Wata tsohuwa mai shekara 70 mai suna Misis Beatrice Aigbedion tana daga cikin mutanen da Hukumar Yaki da Fataucin Miyagun Kwayoyi ta Kasa (NDLEA) ta kama a Jihar Edo, bisa zarginta da safarar wasu miyagun kwayoyi sama da kilo dubu biyar a sassan jihar.
Kakakin Hukumar NDLEA, Femi Babafemi a wata sanarwa da ya fitar a ranar Lahadin da ta gabata, ya tabbatar da faruwar lamarin.
- Kotun Myanmar ta daure Aung San Suu Kyi shekara 4 a kurkuku
- An tsinci gawar yara 8 a cikin tsohuwar mota a Legas
Ya ce bayan kwashe kwanaki ana sa ido, a ranar Laraba 24 ga Nuwamba jami’an NDLEA sun kai farmaki a wani kantin sayar da kayayyaki da ke Uhiere, a Karamar Hukumar Obia ta Arewa maso Gabas a jihar.
Femi ya ce, ’yan sandan sun kwato jimillar kilo 4,261.5 na tabar wiwi, sannan an kama wani da ake zargi mai suna Ikong Stanley a ranar Talata 23 ga Nuwamba, da kilo 1,240 a wani kantin sayar da kayayyaki da ke Uzebba a Karamar Hukumar Owan ta Yamma a jihar, sai kuma aka kama Misisi Aigbedion a Irrua a ranar Larabar da ta gabata.
An kama maganin tari na kodin da Swinol da Rohypnol yayin da wani dillali, Joseph Onyemaechi, mai shekara 50 aka kama shi a Ikpoba Okha, Upper Sakponba, Benin City, a ranar Juma’a da nau’o’in sinadarai masu nauyin kilo 2.055.
Sai Gabriel Akioya da Isa Sal, da aka kama su a ranar Alhamis 25 ga Nuwamba a Irrua, a Karamar Hukumar Esan ta Tsakiya tare da kodin da Tramadol da Swinol da Rohypnol.
