Dan sanda mai farautar ’yan fashi da masu satar mutane, DCP Abba Kyari da dakarunsa sun isa Binuwai domin kamo ’yan bindigar suka kai wa Gwamna Samuel Ortom na Jihar farmaki.
Rundunar ta Abba Kyari ta isa Makurdi ne bisa umarnin Shugaban ’Yan Sandan Najeriya, Mohammed Adamu, na yin cikakken bincike tare da kamowa da kuma tabbatar da hukunta masu alaka da harin.
- Gobara ta tashi a kusa da Masallacin Annabi na Madina
- Yadda gobara ta cinye dukiyoyi a Kasuwar Gashua
- Guguwa ce ta sa na ‘samu juna biyu’ —Mace
- Yadda aka kama wata mata da ke shayar da maciji nononta
Kakakin ’Yan Sanda na Kasa, Frank Mba ya ce, “Za ta jagoranci bincike kan harin daga kowace fuska da aka bayar da rahoto da zummar tabbatar da cafko duk wadanda dalilai suka nuna suna da hannu da kuma gurfanar da su.”
Rundunar da Abba Kyari ke jagoranta ta kunshi kwararrun masu binciken kwakwaf kan inda aka aikata laifi, ababen fashewa, gano zanen yatsu, da sauransu.
Frank Mba ya ce, “Shugaban ’Yan Sandan Najeriya ya umarce su da su su nuna kwarewa a yayin gudanar da aikin tare da hadin gwiwar Rundunar ’Yan Sandan Jihar Binuwai da sauran hukumomin tsaro domin cimma manunfar binciken.”
Gwamna Ortom ya ba da rahoto cewa ’yan bindiga sun kai masa farmaki a Tyomu, yayin da yake hanyarsa ta dawowa Makurdi daga gonarsa a babbar hanyar Makurdi zuwa Gboko.
Wasu ’yan Najeriya sun bayyana tababarsu game harin, amma gwamnan ya ce ba yadda za a yi ya shirya kai masa hari domin a cikin masu tsaronsa akwai Hausawa da Fulani da Yarbawa.
Shugaba Buhari dai, yayin karbar bakuncin Ortom a makon jiya ya yi tir da harin sannan ya yi gargadi cewa a yi hattara da neman siyasantar da al’amarin.
